Parques Naturales

Los espacios naturales protexíos son zones naturales poco tresformaes pola esplotación u ocupación humana. Amás merez la pena la so protección polos paisaxes, los ecosistemes, la flora, la fauna, les formaciones xeolóxiques… ye dicir pol so valir ecolóxicu, estéticu, educativu y científicu.

Na xestión de los Parques Naturales intervién tanto’l Gobiernu del Princiáu como los ayuntamientos  onde s’alcuentren estos espacios. Dambos suelen facer una serie de planes nos que se recueyen les normes de tolo que se pue facer y lo que non. Estes normes tienen que ver con: l’agricultura, el valtu d’árboles y cuidáu de la viesca, la caza, la pesca y el turismu. Too esto faise col envís de mantenelos y meyoralos pero amás pa facer investigaciones, pa favorecer la educación ambiental y pa que disfrutemos al visitalos.

Los parques naturales que tenemos n’Asturies son: Parque Natural de les Fuentes del Narcea, Degaña ya Ibias, Parque Natural de Somiedu y Parque Natural de Redes. Tán toos al rodiu del Cordal Cantábricu porque les zones costeres históricamente siempre tuvieron más poblaes colo que la conservación foi más difícil, anque tamién tienen la so importancia medioambiental como vamos ver más alantre. Tolos parques que vamos descubrir agora suponen el 17% del tarrén asturianu y nellos viven delles especies d’animales perimportantes que vos pueden esplicar los compañeros d’otros ciclos.

Vamos velos ún per ún:

Fontes del Narcea, Degaña ya Ibias:

El Parque Natural de les Fontes del Narcea, Degaña ya Ibias esiste como tal dende’l 2002 y ocupa gran parte de les montañes del sur del conceyu de Cangas del Narcea, casi tol conceyu de Degaña y un poco del oriente del conceyu d’Ibias. Dientro d’esti parque alcuéntrense dos reserves naturales que son: Munieḷḷos y el Cuetu d’Arbás. Esti Parque Natural tamién inclúi los nacimientos de los ríos Narcea ya Ibias asina como los sos primeros afluentes.

Ye un entornu poco pobláu y dedicáu principalmente a la minería y tamién a l’agricultura y ganadería. Los pueblos qu’agrupen a casi tola totalidá d’habitantes son cuatro: Rengos (nes orielles del ríu Narcea, en Cangas del Narcea); Degaña y Cerréu (nes márxenes del ríu Ibias, nel conceyu de Degaña) y Luiña (cerca’l Puertu de la Campa Tormaleo, n’Ibias).

La principal amenaza d’esti estornu ye la minería, pola estroza nes viesques (esplotaciones a cielu abiertu y pistes pal tresporte de materiales estrayíos), les escombreres y los vertíos contaminantes a los ríos.

De la vexetación más representativa pue destacase los fayeos y carbayeos. Tamień esisten otres variedaes d’arboles, matos y plantes abondoses en variedá y cantidá.

No que cinca a la fauna, ye de lo más variao dende los más grandes (l’osu pardu, llobos, xabariles, robezos…) hasta otros más piquiñinos (raposos, melandros, ferres, gallos monteses, fuines…)

Dalgo mui representativo de la zona son unes cases llamaes palloces. Tienen munchu interés porque caltiénense ensin cambios prácticamente dende la época de los castros pola mala comunicación qu’hubo siempre nesta fastera. La palloza ye una casa redonda, col suelu de tierra y col teyáu de paya, por exemplu de centén.

Otres edificaciones, que son una especie de muria que protexe los caxellos de les abeyes, son los cortinos o talameiros.

Somiedu:

El Parque Natural de Somiedu localízase nel área central del Cordal Cantábricu y asítiase nel  conceyu del mesmu nome.

Dalguna de les característiques que más rescamplen d’esti parque ye l’altu grau de conservación n’estàu orixinal. Atropa la flora y fauna más representativa d’esti tipu d’ecosistemes y la so evolución xeolóxica ye una de les llamatives pol gran númberu de fases de modeláu poles que fue pasando.

Les viesques representen casi la cuarta parte del territoriu de Somiedu. Los árboles más abundantes son fayeos, carbayeres, los carrascos o xardones y los texos.

Ente los distintos tipos de viesques, medren gran variedá de matos o morgazos como los miruéndanos, dellos tipos de gorbiza, escoberes, gayuba…

Tamién son importantes los praos de pastu pal ganáu, que suponen una quinta parte del conceyu, munchos asítiense en zones de montaña, puertos y brañes y úsense en branu. Hai otros, a la vera les caseríes, que s’usen p’alimentar al ganáu pel iviernu. Esti usu estacional de los praos fizo posible la conservación d’una gran bayura de flores.

Esti parque tien, pol so pasáu glacial, munches zones onde remansa l’agua como llagos y llagunes que fai posible’l caltenimientu de delles especies alpines y boreales. Estos ambientes d’alta montaña son escasos nel restu d’Asturies lo que-y da un valir especial al parque.

En cuantes a los animales que viven nel parque podemos ver: al osu pardu, el gallu montés, al xabaril, robezu, venáu, corciu, llobu, llebres, llóndrigues… así como esperteyonos, melandros, águiles reales, gurrión de neveru, perdiz parda, ferre palomberu…

Xunto a la flora y fauna de la zona, conviven un grupu de persones nomaos vaqueiros d’alzada que se caractericen pola treshumancia de llargu recorríu. Esta consistía n’abandonar el pueblu nel mes de mayu hasta ochobre, pa subir a les brañes somedanes a pasar tol branu. Diba tola familia, el ganáu y llevaben toles sos pertenencies. Yeren un grupu a parte y teníen una construcción típica que ye’l teitu, mui asemeyáu a la palloza. Gracies a ellos caltiénse viva bona parte de les tradiciones de la zona.

Las Ubiñas- La Mesa:

El Parque Natural de Les Ubiñes-La Mesa intégrenlu los conceyos de Teverga, Quirós y Ḷḷena. Ye un tarrén permontañosu, alcontrándose los cumales más altos na llende con Lleón. Nos conceyos de Ḷḷena y Quirós alcuéntrense Les Ubiñes, que ye’l segundu grupu montañosu per detrás de los Picos d’Europa.

La vexetación del parque rescampla pola so diversidá y el bon estáu de conservación. Esta variedá esplícase pola orografía, la evolución xeolóxica y el baxu nivel de población de los conceyos que lu formen. Ente la variedá d’árboles atopamos: les fayes, los carbayos o rebollos, la bidul, el texu p’l el carrascu.

La importancia de la ganadería na economía local nótase en que una cuarta parte del territoriu de Les Ubiñes – La Mesa encuéntrase ocupáu por praos y pastu pal ganáu. Dalgunes families practicaben la treshumancia pelos branos, los vaquieros, colo que nes brañes podemos atopar dellos teitos.

El cuidáu d’esti espaciu a lo llargo de los años fai posible ver animales xabaces como: l’osu pardu, el gallu montés, l’aigla real, el corciu, el robezu, el xabaril, el llobu, el raposu, el venáu, la llóndriga, l’esperteyón… amás de compartir colos parques naturales de Somiedu y Fontes de Narcea, Degaña ya Ibias especies como’l ferre, el gurrión de neveru o la perdiz parda tien otres propies como la xaronquina verde.

Amás de la importancia de la flora y fauna, esti parque tien el valor añadíu cuestiones culturales como: pintures repestres, cueves arqueolóxiques y el Camín Real de La Mesa que ye una calzada romana a caballu de diez conceyos asturianos que xuntaba Asturies con Lleón.

Redes:

El Parque Natural de Redes localízasa na fastera centro oriental del Cordal Cantábricu, inclúi enteros los conceyos de Casu y Sobrescobiu.

La mayor parte de la población dedícase a la ganadería, sobre too a la estensiva de montaña. Tienen una raza autóctona y llegalmente protexidaa que ye la raza casina o asturiana de montaña, que da orixe al quesu casín. Una gran parte de la población que nun fai llabor de campu dedícase a la minería nos conceyos del valle del Nalón

La bona conservación d’esti entornu fai que podamos atopar osos, robecos, corcios, venaos, llobos, llebres… y ente les aves gallos monteses, ferres, gurriones de neveros, perdices pardes, aigla real …

No que cinca a la vexetación, esti parque tien ún de los territorios más arbolaos d’Asturies, siendo un 33% mui vieyos. La mayor parte son fayes, carbayos, bidules, carrascos, texos, felechos…

Esti parque tien la peculiaridá de tener nel ríu Nalón dos de los banzaos más grandes d’Asturies, el de Rusecu y Tanes. El primeru abastez a la población d’Uvieu, Xixón, Avilés, Llanera, Siero, Noreña, Samartín del Rei Aurelio, Llaviana, Corvera, Illas, Gozón, Carreño y Castrillón. El segundu dedícase a la producción de lletricidá.

Ponga:

El Parque Natural de Ponga inclúi sólo al conceyu de Ponga. Nun principiu diba formar parte del Parque Natural de Redes pola cercanía, pero la comunicación ente estos conceyos ye perdifícil y ello fizo que fuera más fácil la xestión per separao. Tien una superficie de 20.533 h y l’altor del tarrén va dende los 300 m hasta los más de 2.100 m de Peña Ten. L’actividá económica ye principalmente la ganadería.

Nel parque’l grau de conservación ye mui bonu topando viesques mui antigües formaes por carbayos, bedules, fresnos… anque tamién atopamos praos de pastu, gorbicees, castañeos, texos, carrascos…

Toa esta masa de viesques da abellugu a delles especies como l’osu, la llóndriga, varies especies de llebre, ciervos, curcios, robecos, xabariles, gallu montés, aigles, perdices…

Nel conceyu de Ponga consérvense munches muestres etnográfiques y folcklóriques amás de bayura d’horros y cases con corredor. Ún d’esto horros más destacáu ye’l beyosucu, nel desfiladeru de los Beyos, que se caracteriza por ser piquiñín y tener el teyáu a dos agües. D’esta mesma zona ye’l perconocíu quesu de Beyos fechu con una mestura de lleche de cabra, oveya y vaca.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s

Trackback this post  |  Subscribe to the comments via RSS Feed


A %d blogueros les gusta esto: